اسكت ياعم بلا رغيف عيش بلا هم ...خلينا فى بتوع الكوره دول أحسن

والله الواحد يعنى من كتر ما بيشوف مش عارف يكتب عن ايه ولا ايه بس انا شوفت موضوع كدا فى التليفزيون كدا فقولت أكتب عنه ونناقشه مع بعض برضه زى ما اتناقش فى التليفزيون واللقاء كان جامد أوى فأنا هكتبه بطريقتى يعنى ويا رب تعجبكوا يا رب الموضوع بقى اسمه ايه ::: اسكت يا عم بلا رغيف عيش بلا هم ... خلينا فى بتوع الكورة دول أحسن ...!!! ::: ندخل بقى فى البداية والمقدمة يعنى على أد ما قُــسم كدا ...
شئ غريب .. شئ عجيب ..شعب طيب .. غلبان .. تعبان .. هلكان .. شعب بتتدور به الأيام من ضيق إلى أضيق .. ومن سيئ إلى أسوأ .. فقر مدقع .. يعيش تحته أكثر من 40% من السكان ..غلاء فاحش .. طال حتى الطبقات المتوسطة وبدأت تضج به الطبقة فوق المتوسطة .. أمراض .... ابتلاءات .. ابتلاءات .. ابتلاءاااااات
....

أما الشئ العجيب والغريب

إن الشعب بحاله ده .. المفروض يشوف ليه حل .. يطالب بحل .. لأن مش معقول الحياة هتبقى بالخروج من أزمة .. لأزمة .. لمصيبة .. لكارثة .. لأيــام سودا زى الطين ..!!!
لازم يكون فى وقفة وحل .. كل الشعوب بتنطق .. كل الشعوب بتموت عشان تطالب بحقوقها ...
حتى يا ربى الأفارقة اللى بيقولوا عنهم شعوب بدائية ودرجة ثانية .. حتى دول نطقوا .. رفضوا الظلم .. طالبوا بالحقوق بتاعتهم .. قاموا وثاروا .. أيوة انضربوا واتبهدلوا ومات كتير منهم .. لكن برضه مستسلموش .. لأنهم ببساطة .. بيطالبوا بأبسط حقوقهم كآدميين وبشر .. لأنهم ببساطة .. زهقوا من حياة العبودية

طيب يا شعبنا يا طيب يا غلبان .. إحنا مش هنكون شريرين ونقولك أخرج فى انقلابات ولا مظاهرات ولا احتجاجات .. عشان مش يحصلك واوا ولا حاجة .. لكن

لكن من الطبيعى أن الشعب الطيب الغلبان .. اللى مش قادر حتى يقف وقفة يطالب فيها بحقه .. يكون على الأقل مطحون فى الجرى ورا لقمة العيش ومش فاضى لأى حاجة تانية ... لكن ... !!!
لكن اللى ملاحظينه إن شعبنا فاضى لحاجات كثير تانية ...
من فترة سمعنا هتافات جماعية وأصوات عالية فى الشوارع وتصفير وتصفيق وكلاكسات عربيات قالبة الدنيا.... استغربت .. لأنى عارف إن شعبنا دا .. مهما حصل له .. ومهما قاسى .. ومهما عانى .. متعلم الأدب والأصول .. وعمره ما يخرج فى الشوارع ولا يعلى صوته إلا من الشديد القوى

قولت ... يمكن أزمة طوابير العيش اليومية .. لقولها حل ...!!! استهزاء طبعاً

أو .. يمكن أسعار السلع الضرورية اللى تضاعفت مرة واحدة .. رجعت تانى ورخصت زى ما كانت ..!!! استهزاء طبعاً

أو .. يمكن المرتبات زادت لمواجهة موجة الغلاء البشعة ..!!! استهزاء طبعاً

أو .. أو .. أو .. أو .. أو ..
أو حتى يمكن الحصار اترفع عن غزة أو الاحتلال زال من العراق .. !!! .. أهو .. يعنى .. لو مش هنفرح لنا .. نفرح للجيران والإخوان ..!!! استهزاء طبعاً

لكن ....!!!
لكن شوفنا فى الآخر .. إن خروج الجماهير للشوارع وهتفاتهم ومظاهرتهم .. كانت عشان الفرحة بفوز الأهلى بالدورى بعد يعنى مشوار معاناه مع المرض قصدى مع بقية الفرق

مـــــــــــــاتش كـــــــــــــــــــــــووووووووووورة

طبعاً .. من حق الناس تفرح .. من حق الناس تغير مود النكد والهم والغم اللى بقى مالى حياتها .. لكن فى شيئ محير جداااااا؟؟؟ ..
حقيقى نفسى أعرف إزاى واحد بيحضر ماتشات الكورة وبيخرج فى مظاهرات عشان الكورة .. وممكن يتخانق ويقلب الدنيا لو الفريق بتاعه اتغلب ..

إزاى شخص زى دة .. يكون .. هو .. هو .. نفس الشخص اللى بيقف تانى يوم فى طوابييييير العيش الطويلة فى صبر وسكوت وخنوع واستسلام وما باليد حيلة !!!

إزاى يكون .. هو .. هو .. نفس الشخص اللى لما يروح السوق يضرب أخماس فى أسداس لأن السلع الضرورية اليومية أسعارها بقت 3 أو 4 أضعاف .. يبرطم ويسب ويلعن ’’طبعاً فى سره,, .. وزى الشاطر يشترى أو ما يشتريش .. المهم أنه يظل الشخص المثالى المسالم ابن الحلال المتربى!!!

الناس اللى بتتجنن وتتزاحم لما يكون فى حفلة لمطرب أو مطربة أو فيلم جديد فى سينما أو مسرحية .. معقول تكون هى .. هى .. الناس اللى بتعانى من أزمة المواصلات والبطالة والغلاء .........الخ!!!

أنا بس بقول كدا .. علشان تفكر فى حالك .. تفكر فى مصيرك تحاول تحط لنفسك خطط مستقبلية تعيش علشانها خطط تحسسك انك لسه عايش وممتش لكن فين بقى ولا حياة لمن تنادى ... !!!!

ونيجى بقى لإما إنك تسكت فى السراء والضراء .. وتفضل هادى ووديع كدا زى ما انت .. وإما ... تنطق فى الضراء زى السراء ... وتبين إنك صحيح لسة عايش وفيك الروح ومامُتِّش زى ما هم فاكرين ومتصورين ..

نتغير إزاى .. نبتدى منين ؟؟؟!!!